Neftçala rayonunda balıqçılıq və akvakultura sahəsinin təbliği, ölkədə balıq ehtiyatlarının qorunması və aqrar innovasiyaların geniş ictimaiyyətə çatdırılması məqsədilə “I Balıq” Festivalı təşkil olunub.
Doğru.az xəbər verir ki, festival Neftçala Rayon İcra Hakimiyyəti, Kənd Təsərrüfatı Nazirliyinin Aqrar İnnovasiya Mərkəzi və Balıqçılıq və Akvakultura Mərkəzinin birgə təşkilatçılığı ilə baş tutub. Tədbirdə bölgədə fəaliyyət göstərən balıqçılıq və akvakultura müəssisələri, emal şirkətləri məhsullarını təqdim edib, ziyarətçilər isə təzə, hisə verilmiş və dondurulmuş balıq növləri və müasir akvakultura texnologiyaları ilə tanış olublar.
Festivalın açılışında Kənd Təsərrüfatı Nazirliyinin müşaviri Zaur Əliyev, Neftçala Rayon İcra Hakimiyyətinin başçısı Mirhəsən Seyidov, Aqrar İnnovasiya Mərkəzinin direktoru Anar Cəfərov və Balıqçılıq və Akvakultura Mərkəzinin direktoru Ceyhun Əliyev çıxış edərək tədbirin əhəmiyyətini vurğulayıblar. Onlar festivalın yerli sahibkarlığın və turizmin inkişafına, fermer-istehlakçı əlaqələrinin gücləndirilməsinə və aqrar innovasiyaların yayılmasına töhfə verdiyini bildiriblər.
Festival çərçivəsində balıq buraxılışı, müxtəlif qiymətli balıq növlərinin nümayişi, akvakultura proseslərini əks etdirən texnoloji təqdimatlar və USM diaqnostika avadanlıqları vasitəsilə balıq yetişdirilməsinin mərhələləri təqdim olunub. Media nümayəndələri üçün infoturlar və müəssisə ziyarətləri də təşkil edilib.
Tədbirlə paralel olaraq 90-cı yubiley Aqrar Biznes Festivalı keçirilərək müasir aqrar texnologiyalar, kənd təsərrüfatı texnikaları və startap layihələri nümayiş etdirilib.
Neftçalanın ilk “Balıq Festivalı” bölgənin balıqçılıq irsi və turizm imkanlarının tanıdılması baxımından uğurlu və rəngarəng layihə kimi yadda qalıb.
DOĞRU.AZ
