“Sanqi Sur – Zəngəzurdan keçən yol…” sənədli filminin təqdimatı keçirilib.
Doğru.az xəbər verir ki, film “İpək Yolu Mədəni və Tarixi Araşdırmalar” İctimai Birliyinin, Azərbaycan Respublikası Qeyri-Hökumət Təşkilatlarına Dövlət Dəstəyi Agentliyinin donorluğu və Türk Mədəniyyəti və İrsi Fondunun tərəfdaşlığı ilə ərsəyə gəlib.
Təqdimatda ASAN Könüllüləri, Hədəf Şirkətlər Qrupu, tanınmış ziyalılar və diplomatik nümayəndəliklərin təmsilçiləri iştirak ediblər. Aida Eyvazlı Göytürkün ssenarisi əsasında hazırlanan film Zəngi tayfalarının az araşdırılmış tarixinə yeni baxış təqdim edir. Qısa filmdə tayfanın ilk yaşadıqları ərazilər, qəhrəmanlıqları və Azərbaycanla bağlılığı haqqında faktlar yer alıb.
Araşdırmaya Misir, Özbəkistan və Azərbaycandan olan elm adamları – türkoloq professor Firudin Cəlilov, AMEA-nın baş elmi işçisi Ramin Əlizadə, Səmərqənd Dövlət Universitetinin dekanı Hazratkul Abroyev, araşdırmaçı jurnalist Hokim Sattori və misirli tədqiqatçı Əhməd Tarbik dəstək veriblər. Filmin bir hissəsi Türk Mədəniyyəti və İrsi Fondunun dəstəyi ilə Daşkənd və Səmərqənddə çəkilib.
Təqdimatdan sonra Qırğızıstanın Azərbaycandakı səfiri Maqsad Mamutkulov və Özbəkistan səfirliyinin müşaviri Sancar Mahmudov çıxış edərək filmin türk dövlətlərinin birliyinə işıq saldığını vurğuladılar. Onlar ekran işinin qırğız və özbək dillərinə tərcümə olunmasının vacibliyini qeyd etdilər.
Layihə rəhbəri Aida Eyvazlı Göytürk bildirib ki, film türk dünyasının yol xəritəsini əks etdirən mühüm araşdırmadır: “Bu film Zəngəzura gedən yolun açılacaq böyük tarixinin ilk müjdəsidir.”
Tədbirdə Türküstan.az saytının redaktoru Aqil Camal və STM sektor müdiri Əfqan Vəliyev də çıxış edərək filmin türk dünyasının çağırışları ilə səsləşdiyini qeyd ediblər.
Filmin yaradıcı heyəti:
Redaktor – Vəli Əkbər,
Ssenari müəllifi və layihə rəhbəri – Aida Eyvazlı Göytürk,
Quruluşçu rejissor – Vüsal Orucov,
Rejissor – Rəna Yunuslu,
Operatorlar – Fariz Şıxaəlizadə və Rüstəm Abdullayev,
Montajçı – Rauf Əzimov.
Tədbirin sonunda dəstək göstərən qurumlara “Təşəkkürnamə” təqdim olunub. Təltif olunanlar arasında Doğru.az da yer alıb.
DOĞRU.AZ
