Türk Mədəniyyəti və İrsi Fondunun prezidenti Aktotı Raimkulova 28 noyabr 2025-ci il tarixində Qazaxıstan Respublikasının Xarici İşlər naziri Yermek Koşerbayev və Ədliyyə naziri Erlan Sərsembayevlə görüşüb.
Doğru.az xəbər verir ki, görüşlərdə türk dünyasında mədəni irsin qorunması, sistemləşdirilməsi və beynəlxalq platformalarda təbliği ilə bağlı əməkdaşlıq məsələləri müzakirə olunub.
Tərəflər mədəniyyət və irs sahəsində əməkdaşlığı tənzimləyəcək normativ-hüquqi bazanın hazırlanması barədə razılığa gəliblər. Həmçinin 2026-cı ildə mədəni sərvətlərin qanunsuz dövriyyəsinə qarşı mübarizəyə həsr olunacaq beynəlxalq konfrans çərçivəsində birgə fəaliyyətin təşkil olunması müzakirə edilib.
Aktotı Raimkulova görüş zamanı Qazaxıstan Ədliyyə Nazirliyinin hüquqi islahatlar sahəsində ardıcıl fəaliyyətini yüksək qiymətləndirib və bu qurumun türk dövlətləri arasında hüquqi əməkdaşlığa mühüm töhfə verdiyini bildirib. Nazir Erlan Sərsembayev isə Fondun türk dünyasının mədəni dəyərlərini beynəlxalq səviyyədə tanıtdırmaq istiqamətində gördüyü işi xüsusi vurğulayıb.
Xarici İşlər naziri Yermek Koşerbayevlə görüşdə Fondun cari ildə həyata keçirdiyi iri miqyaslı layihələr təqdim olunub və nazir tərəfindən yüksək qiymətləndirilib. Koşerbayev Qazaxıstanın türk dünyası ilə humanitar və mədəni əlaqələri gücləndirmək üçün daim əməkdaşlığa hazır olduğunu qeyd edib.
Görüşlərin davamında 2026-cı il üçün planlaşdırılan yeni layihələr və gələcək birgə təşəbbüslər ətrafında fikir mübadiləsi aparılıb.
DOĞRU.AZ
